Донација на Народна Република Кина

    На ден 30.12.2024 година, Амбасадорот на Народна Република Кина и неговите придружници беа свечано пречекани од Директорот на училиштето доц. д-р Горанчо Јакимов и дел од вработените во ООУ „Рајко Жинзифов“ . 

    Амбасадорот додели 15 вредносни ваучери на ученици кои покажаа извонредни успеси во учебната 2023/2024 година. Ваучерите беа доделени на 15 ученици кои освоија прво, второ или трето место на меѓународни, државни или регионални натпревари. Со оваа донација се оддава признание на трудот, посветеноста и постигнувањата на учениците, поттикнувајќи ги за понатамошни успеси. 

 

предметен наставник Магдалена Бадарова 

 

Набљудуваме, истажуваме и учиме Биологија и Природни науки низ различни активности

 

     Во првото полугодие одржани се интересни активности на часовите по Биологија и Природни науки.

Учениците од VI - б одделение по предметот Природни науки  преку презентација се запознаа со градбата и функцијата на човечкиот скелет. Тие користеа слики, постери, училишен модел на човечки скелет за да ги идентификуваат клучните коски. Учениците добија исечени делови од хартиен скелет и требаше да ги состават правилно а групите се натпреваруваа кој побрзо ке го заврши предизвикот. Учениците беа активни, заинтересирани и соработуваа во групите.

          Во истото одделение VI - б одд. учениците по предметот Природни науки се запознаа со Составот на крвта (црвени, бели крвни клетки,крвни плочки и крвна плазма) преку практични вежби. Експеримент (модел на крв) -  за таа цел користеа: сок од јаболко (крвна плазма), црвени бонбони скителс (црвени крвни клетки), бели ментол бонбони(бели крвни клетки) и шарени мрвици (крвни плочки). Дискутираа за улогата на секој дел.Учениците уживаа во улогите во практичните експерименти беа активни, и лесно ја разбраа наставната единица.

Со учениците од VII одделение по предметот Биологија истражувавме за градбата на растителната и животинската клетка и ги воочивме разликите во нивните делови како и нивната функција во клетките. Користејки различни материјали учениците следеа презентација, работеа во групи, беа креативни и создадоа мали уметнички дела од клетки. На крај ги презентираа своите изработки со објаснување што научиле на часот. A исто така тие видоа и како изгледаат клетките на ципа од кромид под микроскоп.

Учениците од VIII - б одделение по предметот Биологија испитуваа присуство на различни хранливи материи (глукоза, скроб, протеини, масти) во различни видови храна со користење хемиски реагенси и едноставни лабораториски тестови. Учениците работеа во 5 групи, експериментираа со ресурсите што им беа на располагање и презентираа резултати. Тие беа  ангажирани, активно учествуваа во експериментите и покажаа интерес за анализата на храната.

Учениците од IX - а одделение по предметот Биологија добија задача да ја истражат и разберат градбата на семето од грав преку практични активности и набљудувања.. Овој час решивме да го одржиме во нашата училница на отворено,која е одлично место за истражување. Тука се наоѓа и нашата симпатична мала градина каде уживавме  во мирисите на зачински билки.

 

предметен наставник  Билјана Наунова

 

Соработка со Институт за специјална едукација и рехабилитација Филозофски факуклтет при УКИМ

    Во текот на првото полугодие од учебната 2024/2025 година за студенти од Институтот за Специјална едукација и рехабилитација - Филозофски факултет - УКИМ, се реализираше пракса по предметот „Инклузивна пракса“ со проф. д-р Наташа Чичевска Јованова и училишниот дефектолог м-р Адријана Кукоска, согласно меморандумот потпишан помеѓу Општина Кисела Вода и ФЗФ. Целта на праксата беше студентите да се запознаат со инклизивното образование, инклузивната клима во училиштето, инклузивното образование на учениците со посебни образовни потреби во училиштето, активно учество на студентите во креирање и спроведување на индивидуален образовен план, учество во тимска работа и индивидуална работа со учениците со посебни образовни потреби.

дефектолог м-р Адријана Кукоска

 

Учество на Новогодишен фудбалски турнир „И јас сакам фудбал, и...“

        На ден 28.12.2024 год.  нашето училиште беше дел од првиот фудбалски турнир „И јас сакам фудбал, и ...“ кој се одржа  во спортската сала „Архиепископ Доситеј“ во населба Кисела Вода организиран од ЖФК „Џиџи“ во соработка со Општина Кисела Вода.  На фудбалскиот турнир учествуваа момчиња и девојчиња од 8 до 10 години од општинските основни училишта во Општина Кисела Вода. Освен натпревари помеѓу училиштата  се реализираа натпревари и помеѓу младите фудбалерки од ЖФК „Џи-Џи“ и фудбалерите од ФК Форца-Вардар. Со овој голем настан се пренесе силна порака на сите дека фудбалот го сакаат подеднакво и девојчињата и момчињата. ФУДБАЛОТ Е СПОРТ И СРЕЌА ЗА СИТЕ!!!       

 предметен наставник Зоран Петковски

 одделенски наставник Александра Илијева Арсовска     

 

                                             

ПРОЕКТ „УНАПРЕДУВАЊЕ НА МЕНТАЛНОТО ЗДРАВЈЕ“

    Во текот на првото полугодие во учебната 2024/2025 година стручните соработници училишниот педагог, психолог и дефектолог реализираа  работилници на теми поврзани со ментално здравје на младите.

        Во месец септември од страна на училишниот педагог, психолог и дефектолог реализирани се вкупно 11 работолници: „Грижа за ментално здравје“, „Моето другарче“, „Сите сме еднакви“ и „Тоа сум јас“ со учениците од I, VI, VII и VIII одделение. Во овие работилници земаа учество вкупно 220 ученици. Овие  работилници имаат за цел  училиштето да го направат место во кое учениците ќе сакаат да престојуваат, во кое ќе бидат вклучени и нивното мислење и нивните чувства ќе бидат земени предвид.

    Во месец октомври  реализирани се вкупно 26 работилници од страна на училишниот дефектолог, педагог и психолог на различни теми: „Емоции“, „Скршено срце“, „Другарство“, „Грижа за ментално здравје“, „Кога се чувствувам среќно/тажно/уплашено“, „Сите заедно се дружиме“, „Запознавање со инклузивна училница на отворено“, „Тоа сум јас“ и „Убави зборови за моето другарче“. Во овие работилници земаа учество вкупно 482 ученика од I, II, III, IV,V, VI, VIII и IX одделение. Целта на овие работилници е учениците да ги препознаат своите емоции, развивање на емпатија кај учениците и почитување на различностите.

    Во месец ноември реализирани се вкупно 22 работилници. Темите кои се обработени во склоп на работилниците имаат за цел развивање на подобра инклузивна средина, толеранција, асертивна комуникација, самодоверба, самопочитување и почитување на другите.  Вкупно 388 ученици и 29 родители учествуваа на некои од следните работилници „Моите чувства – мојата среќна и тажна страница“, „Скршено срце“, „Другарство“, „Како да го подобрам однесувањето“, „Се за мене“, „Сите сме различни“, „Инклузивен јазик“, „Инклузија“ , „Убавините на различностите“ и „Стилови на родителство“ .

    Во месец декември од страна на стручните соработници училишниот психолог, педагог и дефектолог реализирани се вкупно 21 работилница на различни теми поврзани со ментално здравје: „Сите сме дел од едно цело“, „Исти насоки – различни цртежи“, „Заедно сме посилни“, „Како да бидам самоуверен“, „Самопочитување – свест за себе“, „Другарство“, „Надминување на мојот страв“ и „5 разлики меѓу нас“ . Во oвие работилници земаа учество вкупно 418 ученици од I, II, IV, V, VI, VII, VIII и IX одд.

педагог Весна Рафеска

психолог Бранка Бранковиќ

дефектолог Адријана Кукоска

 

Интерен училишен проект „Убавините на различностите“

         Во текот на првото полугодие од учебната 2024/2025 година училишниот дефектолог го реализираше интерниот училишен проект „Убавините  на  различностите“ чија цел има поддршка на учениците со различни можности, способности и различна етничка припадност, подигнување на свеста кај учениците  а прифаќање на различностите и надминување на присутните предрасуди и стереотипи, формирање на Училишен центар за почитување на различностите кој ќе работи во училиштето и пошироката локална средина. 

    Се формираше тим  на наставници и се определија задолженијата и договор за понатамошните активности. Учениците се информираа, се запознаа со интерниот училишен проект и тековните активности. Се реализираше АНКЕТА 1  и се формираше  Училишен центар за почитување на различности со ученици од VIII и IX одделение. 

    Се реализираа работилница „Инклузија“ и работилница „Инклузивен јазик“.  Беше распишан ликовен и литературен конкурс на тема „Убавините на различностите- сите сме дел од едно цело“.  Се подготви флаер со заклучоци од досега сработеното, се подготови, се  дизајнираше и се испечати збирката. Збирката, флаерот и креативните изработки се промовираа во училиштето при одбележување на 3 декември меѓународен ден на лицата со попреченост.

    Во рамки на проектот имавме и хуманитарна акција, со средствата се обезбедија пакетчиња кои беа дискретно поделени  на учениците со попреченост и учениците од социјално загрозени  средини.

 

дефектолог м-р Адријана Кукоска

 

Новогодишна приредба за родители

    На ден 26.12.2024 год.  учениците од III-д одделение во пресрет на новогодишните и божиќните празници подготвија и рализираа новогодишна приредба пред своите родители под наслов „Потрага по Дедо Мраз“. 

    Во приредбата беа активно вклучени сите ученици од одделението кои на интересен начин преку драматизација, песна и ритмичка игра пренесоа новогодишна магија во училницата но и интересна порака кон своите најблиски дека на децата не им се потребни само скапите и модерни подароци, компјутери и  телефони за новогодишните и божиќните празници, туку некогаш единствено што посакуваат е времето и љубовта  од своите родители, дека треба да се учи за знаење, а не за петки, дека не треба да се искористуваат родителите. 

    Родителите  со голем интерес ја проследија истата, беа пресреќни и искажаа задоволство што нивните деца се ангажирани .

СРЕЌНА НОВА ГОДИНА!

одделенски наставник Елена Стојановска 

 

ТЕХНИКИ ЗА УСПЕШНО УЧЕЊЕ

        Согласно годишните планирања во текот на првото полугодие во учебната 2024/2025 година стручните соработници училишниот педагог и психолог реализираа работилници на тема „Техники за успешно учење“ со учениците од VI одделение. 

        Работилниците имаат интерактивен карактер. Претходно, на учениците им беше зададен тест, со цел да откријат на кој начин најлесно учат.  Целта на работилниците е кај учениците да се развијат вештини за самостојно учење, да умеат да го препознаат сопствениот начин/стил на учење и „да научат како да учат“.

        Истите работилници се реализирани со учениците кои имаат намален успех на крај на првото тримесечје во учебната 2024/2025 година и дадени им се конкретни насоки на кои начин да го подобрат училишниот успех. 

психолог Бранка Бранковиќ 

педагог Весна Рафеска

 

ПРОЕКТ „УЧИЛИШТЕ БЕЗ НАСИЛСТВО“

        Во текот на првото полугодие во учебната 2024/2025 година стручните соработници училишниот педагог и психолог реализираа работилници на теми поврзани со врсничко насилство „Булинг“, „Толеранција“ и „Стереотипи и предрасуди“. Во овие работилници учествуваа вкупно 124 ученика од I,V,VI и IX одделение. 

      Проблемот со врсничкото насилство, познато како булинг, е широко распространет меѓу младите. Поради тоа, неопходно е да се почне со подигнување на јавната свест за тежината на овој проблем и последиците што врсничкото насилството ги остава врз кревката детска психа. 

        Целта на овие работилници е да се препознаат карактеристики на насилство, насилникот и жртвата, да се унапредат односите и комуникацијата помеѓу учениците, да се зајакнаат знаењето и вештините на учениците за конструктивно решавање на конфликти, како и да се развие способност да се идентификува изворот на конфликтот.

педагог Весна Рафеска

психолог Бранка Бранковиќ 

Новогодишна претстава со Хокус, Покус и Дедо Мраз

                    Топлината и убавината на новогодишните празници е во магијата на споделувањето среќа, а таа се шири и пренесува само со убави дела. Затоа учениците од III-д одд. во соработка со родител на ден 13.12.2024 год. имаа можност да реализираат воннаставна активност следење на интерактивна Новогодишна  претстава под наслов „Хокус, Покус и Дедо Мраз“ во хотел  „Континентал“. Со голем интерес и воодушевување  ја следеа  претставата, учествуваа во неа, научија многу нови факти, се дружеа со Дедо Мраз и неговите пријатели. Следеше фотографирање и поделба на многу посакуваните подароци од Дедо Мраз—пакетчињата. Потоа се префрливме во работилницата на Дедо Мраз каде учениците имаа можност да изработуваат новогодишни лампиони од гипс и разновидни украси од различни материјали. Крајот на активностите ги заокруживме со мала коктел забава. Привилегија е да се биде дел од овој настан. Благодарност до родителот!!!

            Во Новата 2025 ви посакуваме многу подароци под вашата елка, многу среќа во вашиот дом и уште повеќе љубов во вашите срца. Среќни празници!!!

одделенски  наставник Елена Стојановска 

 

Новогодишен хепенинг

        На ден 25.12.2024 год. среда во подрачното училиште се реализираше Новогодишен хепенинг од хуманитарен карактер. Училишниот хол пулсираше во новогодишно расположение. Тука посетителите имаа можност да купат автентично рачно изработени новогодишни сувенири, вкусна храна, украси, пригодни подароци и тоа се по симболична цена.

        Учесници беа сите ученици од I до IX одделение заедно со своите класни раководители како и нивните родители. Парите кои беа собрани од базарот беа лично врачени на родителите чија куќа беше опожарена. Родителите искажаа задоволство и ја поздравија идејата за релизираната  хуманитарна акција. Парите можеби не беа многу, но во вакви моменти делата говорат многу повеќе.

Огромна благодарност до сите учесници!

одделенски наставници и класните раководители од предметна настава  од подрачното училиште и училишен педагог Весна Рафеска

 

Посета на Киноверзум Кисела Вода

На ден 19.12.2024г., учениците од петто одделение ја проследија кино-проекцијата Дедо Мраз -Супер херој, во Киноверзум Кисела Вода. Учениците со задоволство и внимание го проследија филмот, кој изобилуваше со примената на современата технологија. 

Општински настан ,,Сега се чита”

        Под менторство на библиотекарот ученици од 11 и 12 години земаа учество на општински настан ,,Сега се чита” со низа творечки и креативни активности.

библиотекар Александра Милчева

 

ВО ЧЕСТ НА СВ. КЛИМЕНТ ОХРИДСКИ

        На 6.12.2024 год. се одбележа денот на Св. Климент Охридски со ученици од VI—а и IX—а одделение. Најнапред беше прочитан реферат посветен за животот и делото на Климент, потоа беше проследена презентација за ширењето на македонскиот јазик и култура преку Охридската книжевна школа во Охрид, неговата големина во однос на учителствувањето и прпопведање за вистинските вредности на обичниот човек. 

        Следеа презентации на изработки-хамери за Св Кирил и Методиј и Св Климент-како нивни најистакнат ученик. Дел од учениците од VI одделение напишаа  лични творби и истите беа презентирани пред останатите ученици. На самиот крај учениците истакнаа дека Климент е најголемиот почитувач на јазикот и вистинските човекови вредности за кои и ние треба да се залагаме. ЧЕСТИТ ПРАЗНИК! 

 „БИСЕРЕН  ЃЕРДАН“

Денес е празник светол,

за него знае и светот.

Свети Климент го славиме,

неговото дело да го поздравиме!

 

Со перо во рака, во ноќите темни,

неуморно букви од азбука реди.

Глаголица тешка одлучно смени, 

секоја буква богатство вреди.

 

Ко од охридски бисери ѓердан,

букви во Кирилица нанижа.

Охрид на писменоста лулка стана

и за знаење најголем мегдан.

 

Денес е празник светол, 

за него знае и светот.

Македонија патронот свој го слави,

исправете сите гордо глави!

               

ученик Стела Шоклевска VI-а одд.

предметен наставник Љуба Мишевска

 

Реализирана театарска посета

        На ден 3 декември 2024 година, учениците од V—a и V—б паралелка, со своите наставнички Татјана Трпеска и Виолета Николин, следеа преубава театарска претстава во Домот на културата во с. Драчево. Учениците со задоволство ја следеа претставата „Црвенкапа“ која се реализираше со постојана интеракција меѓу учениците и глумците. 

До следното видување, довидување!!!

одделенски наставници Татјана Трпеска и Виолета Николин

 

ОДБЕЛЕЖУВАЊЕ НА 3 ДЕКЕМВРИ МЕЃУНАРОДЕН ДЕН НА ЛИЦАТА СО ПОПРЕЧЕНОСТ

       Денес на 3 Декември, Меѓународниот ден на лицата со попреченост, во нашето училиште го одбележивме со отварање на Сензорна соба и отварање на првата инклузивна училница на отворено во Општина Кисела Вода со градоначалникот на општина Кисела Вода Орце Ѓорѓиевски.

    Потоа се прочита пригоден реферат, се промовираа креативните изработки, флаер и збирката на творби од учениците на тема: „Убавините на различностите – Сите сме дел од едно цело“, како дел од интерниот училишен проект. Се промовираа и дел од изработките од реализираните работилници со учениците од I до IX одделение. Секој ученик на свој, единствен начин попринесе да се одбележи овој значаен ден за лицата со попреченост, со порака дека секојдневно ги поддржуваме, поттикнуваме, меѓусебно се почитуваме и се бориме да бидеме еднакви!

ИНКЛУЗИВНА УЧИЛНИЦА НА ОТВОРЕНО  

      Во нашето училиште со цел да се задоволат потребите на сите ученици подеднакво, директорот Горанчо Јакимов со поддршка од дефектологот Адријана Кукоска, предметните наставници Билјана Наунова, Даниел Манасиев, Тони Петрушевски, Горан Петковиќ, Никола Соколовски, Ангела А. Горгиевска, психологот Бранка Бранковиќ и помошно - техничките лица Игор Миленкоски и Љупчо Петрески го реализираше проектот „Инклузивна училница на отворено“ која е единствена во општината. Инклузивните училници вообичаено се дефинираат како училници дизајнирани за учениците со посебни образовни потреби да учат заедно со типичните ученици во одделенија соодветни на возраста.

    Нашата инклузивна училница на отворено ја опремивме со дидактички матeријали кои самостојно ги изработивме, со предмети од секојдневниот живот, елеметни и играчки кои го задржуваат вниманието на децата. Секој елемент различно влијае за развивање на креативноста, моториката, сетилата, ориентација, координација, мислење и секој од нив има позитивен ефект за развојот на детето. Инклузивната училница на отворено тековно ќе ја опремуваме во зависност од потребите на нашите ученици.

Во инклузивната училница на отворено се реализираа повеќе инклузивни работилници преку кои учениците се запознаа со дидактичките средства, нивната намамена и бенефит.

СЕНЗОРНА СОБА

     Во нашето училиште, со поддршка од Општина Кисела Вода, отворивме сензорна соба која ја опремивме со сензорни средства и дидактички материјали кои ќе ја подобрат способноста за учење на учениците со попреченост. На отварањето присуствуваше Градоначалникот Орце Ѓорѓиевски и претставници од Општина Кисела Вода. Во сензорната соба преку активирање на сетилата за вид, слух, допир, вкус и мирис, се подобрува способноста на учениците со попреченост да разберат, запаметат и да применат нови информации.                                                                                                                                                               

дефектолог м-р Адријана Кукоска

 

 

 

Презентација на програмата за унапредување на менталното здравје – работилница на тема „Стилови на родителство“

 

        На ден 28.11.2024 год. на Совет на родители од страна на училишниот педагог Весна Рафеска беше презентирана програмата за унапредување на менталното здравје и реализирана работилница  на тема „Стилови на родителство“

    Целта на оваа работилница е препознавање на стиловите на родителство и ефектите врз децата, промовирање на менталното здравје и учењето, како и создавање на средина која ја минимизира стигмата и ја зголемува довербата меѓу учениците, персоналот, родителите и заедницата.

педагог Весна Рафеска

 

Есенско уредување на училишниот двор - Ученички парламент

    

        Согласно Годишната програма за работа на Ученичкиот парламент беше дадена иницијатива за есенско уредување на училишниот двор.             

        Акцијата се одржа на 27.11.2024. Во акцијата учествуваа по 7 ученици од секоја паралелка од петто до деветто оддделение.

предметен наставник Магдалена Бадарова

Натпревар на општинско ниво во организација на противпожарниот сојуз на Кисела Вода

    Во организација на противпожарниот сојуз на Кисела Вода, на ден 25.11.2024 год. се одржа натпревар на општинско ниво.

Преставници од нашето училиште :

1.Андреј Тасевски VIII—а

2.Мила Кечовска VIII—а

3.Ива Здравеска VIII—а

    Воедно предадовме творби, изработени од нашите ученици, во делот на Македонски јазик и Ликовна уметност.

Очекуваме успех и позитивни резултати .

предметен наставници Горан Петковиќ

 

Обработка на лектирата „Доктор Офболи“

        Учениците од III—г и III—д  одделение на 20.11.2024 год. ја обработуваа лектирата „Доктор Офболи“ преку посета и следење на балетската претстава во Националната опера и балет. Претставата се состоеше од два чина.

        Учениците имаа можност лектирното дело  да го следат визуелно, да се запознаат со сцена, театар, глумци, музика, ефекти, костими. Тоа е класична сказна меѓу доброто и злото, во која се разбира дека победува доброто. Уживаа во следењето на балетот и откако се вратија во училиште продолжија со своите тековни активности: ги средуваа своите впечатоци, одговараа на прашања, илустрираа, изработија книга, драматизираа под маски.

        Целта на часот беше постигната и беше донесен следниот важен заклучок: Хуманоста, пријателствата и дружбите ги соединуваат луѓето!                                            

одделенски наставници Елена Стојановска и Валентина Димишковска