Wednesday, June 21, 2017

ПРОМОЦИЈА НА НАЈДОБРИТЕ УЧЕНИЦИ ВО IX одделение


На 20.06.2017 год. во 18 часот во просториите на начето училиште се реализираше промоцијата на најдобрите ученици во IX одд.  од генерација  2009-2017, на која беа промовирани нивните индивидуални постигнувања во текот на деветгодишното образование во нашето училиште. На промоцијата беа поканети вкупно 20 ученика со континуиран одличен успех закитени со низа дипломи, пофалници и признанија за учества на натпревари од различни научни области. Најнапред беше промовиран ученикот на генерацијата Мартина Ристеска од IX-в одд. на која директорката на училиштето и врачи награда “таблет“ како најдобра ученичка на генерација 2009-2017 год.

Со пофалници и книги беа наградени и останатите 19  ученици кои исто така заслужуваат да бидат промовирани пред учениците, родителите и наставниците. Тоа се учениците: Ана Марија Тенџеревска, Нена Павловска, Магдалена Петрушевска и Моника Давчевска од 9-а одд; Моника Кочманова, Петар Груевски и Мила Кировска од 9-б одд; Викторија Бакиќ и Филип Ташковски од 9-в одд; Кони Маркова, Исидора Јаковлевска, Филип Ѓоргиев, Михаела Костовска, Јована Петровска, Глорија Атанасовска, Теодора Ангеловска, Ангела Трајковска, и Аника Чорбеска од 9-г одд. Со желби за понатамошни успеси промоцијата заврши. Одговорен наставник за оваа значајна свеченост е наставничката по македонски јазик Љуба Мишевска.


Tuesday, May 23, 2017

ПРОФЕСИОНАЛНА ОРИЕНТАЦИЈА НА УЧЕНИЦИТЕ ОД ДЕВЕТО ОДДЕЛЕНИЕ

Согласно  годишното планирање и оваа учебна година беа реализирани повеќе активности за професионалната ориентација со учениците од девето одделение.
Уште во текот на месец февруари од страна на психологот во училиштето Јорданка Радевска беа применети тестови за утврдување на општите и специфичните интелектуални способности на учениците како и утврдување на професионалните интереси и примена на скали за самопроценка на професионалните интереси. По обработката на тестовите се врши поврзаност помеѓу интелектуалните способности, успехот и интересите  на учениците.
По објавувањето на Конкусот за упис во средните државни училишта се изготвува презентација за Мрежата на средни државни училишта на град Скопје. Презентацијата ја реализираше педагогот на училиштето Весна Рафеска каде учениците се запознаа со видовите средни училишта и струките во поедини училишта. Детално беа појаснети критериумите за избор на ученици, предмети кои се предвидени во критериумите за рангирање на успехот, како и потребните документи за запишување.
Во месец март и април 2017 година во соработка со средните приватни и државни училишта во нашето училиште со деветите одделение беа реализирани презентации од следните училишта: Средно приватно училиште „Јакија Кемал“, „Саба“,  „International Nigh School“, ДСУ „Боро Петрушевски“,ДСУ „Владо Тасевски“,Гимназија „Раде Ј Корчагин“, ДСУ„ Здравко Цветковски“ ДСУ „Браќа Миладиновци“, ДСУ „Лазар Танев“

Во текот на првата половина од месец април психологот водеше индивидуални разговори и консултации со учениците во врска со изборот на училиште за понатамошно школување и даваше писмена препорака на секој ученик за избор на средно училиште.

„Традиција“


     На 17.05.2017(среда) учениците од I- IX одделение од подрачното училиште од населба Пинтија во голем број облечени во народна носија се претставија со пригодна програма во емисијата „Голем одмор“ на МТВ. Програмата под мотото„Традиција“ беше исполнета со изведба на кореографија на народните песни „Дафино вино црвено“, „Јовано, Јованке“, „Со маки сум се родила“, изведба на буфчанското оро, извадок од драмата „Македонска крвава свадба“. Во емисијата се претставија и талентираните ученици од нашето училиште, кои ги покажаа своите трофеи: медалји, пехари и многубројни признанија кои ги стекнале на регионалните и меѓународните натпревари. Во научното катче учениците од IX одделение истражуваа, а во уметничкото катче твореа на тема„Традиција“.


Одговорен наставник: Даниела Костадинова 

Monday, May 8, 2017

Ѓурѓовден



На 05. 05. 2017г. општина Кисела Вода традиционално по 19 пат го одбележа својот патронен празник Ѓурѓовден. Овој голем пролетен празник кој го најавува будењето на природата и празнувањето на животот со пригодна програма беше одбележан во паркот Шопен.
Во одбележувањето на овој празник беа вклучени голем број ученици од основните училишта и дечиња од градинките кои гравитираат на територијата на општина Кисела Вода. Тие пред големиот број присутни се претставија преку изведба на музичко ритмички точки. Свој придонес дадоа и ученици од нашето училиште односно сите девојчиња од трето одделение кои со цветни декорации учествуваа во Цветното дефиле.
Општина Кисела Вода со одбележувањето на Ѓурѓовден, празник кој традиционално бил прославуван од населението во општината, докажува дека се грижи за зачувување на традициите и обичаите.





Приредби за идните првачиња

На 03.05.2017 во подрачното училиште,, Рајко Жинзифов" во населба Пинтија беше одржана пригодна Приредба за нашите идни првачиња од градинката „Весели цветови“- клон ЃУРЃИЦА што ја подготвија учениците од I - V одд. Од училиштето им подаривме Боенка и дрвени боички. Идните првачиња го покажаа задоволството од посетата во нашето училиште и не поканија да ја посетиме нивната Градинка!




Приредба во градинката „8 Март“ - населба Драчево

На 04.05.04.2017 година учениците од петтите оделенија од централното училиште под раководство на нивните одделенски наставници Софија Лукровска, Билјана Стефковска, Билјана Илиева и Елена Стојановска со дел од планираните слободни активности организираа пригодна програма и се претставија пред дечињата од соседната градинка, идните првачиња.
На оваа приредба од страна на учениците беа изведени неколку драматизации и ритмички игри. За време на приредбата преовладуваше весело расположение, а задоволството беше почувствувано од двете страни.

На крајот од приредбата на дечињата им беа поделени брошури со боенка и дрвени боички . 

Monday, April 24, 2017

ЗАПОЧНУВА ЗАПИШУВАЊЕТО НА ПРВАЧИЊАТА ЗА УЧЕБНАТА 2017/2018 ГОДИНА





Меѓународен детски литературен   фестивал ,,Детско царство“ 


На меѓународениот детски литературен  фестивал ,,Детско царство“  кој се одржува во Бања Лука на 28. 04. 2017г., ученичката Сара Ибровиќ од  III-б одд. под менторство на наставничката Мануела Маркоска, влезе во потесниот избор во мала категорија и освои прво место.
Сара е гордост на семејството, наставничката, на нашето училиште ООУ,,Рајко Жинзифов“, а посебно на нашата татковина Македонија, која ја претстави во најдобро светло и ги доби сите пофални зборови од жири комисијата. Во иднина да биде уште подобра и поуспешна во поетските води, но и на други полиња.




ФРАНЦУСКО-ГЕРМАНСКИ САЕМ ЗА ДЕТСКА ЛИТЕРАТУРА 2017!

На 25.04.2017 во просториите на Универзитетската Библиотека „Свети Климент Охридски“ во Скопје беше одржан саемот за детска литература во организрација на Францускиот Институт и Гете Институтот од Скопје. Саемот беше отворен од Амбасадорите на Франција и Германија. Беа реализирани неколку часовни работилници во кои свое учество за француски јазик заземаа две скопски училишта од кои едното беше и нашето училиште ООУ„Рајко Жинзифов“. 21 ученик од подрачното училиште од н. Пинтија со наставничката по француски јазик Анета Ѓуровска-Арсовска остварија средби и беа дел од забавни работилници со француските писатели за деца Ан Мале (Anne MAHLET) и Марк Бутаван (Marc BOUTAVANT).

Friday, April 21, 2017

„Ракатки-2017“

                   На 22. и 23. 04. 2017 год. се одржа тринаесетиот литературен фестивал „Ракатки-2017“ во општина Радовиш. Ученичката Маркоска Мила ја освои првата награда за литературната творба „Во морето од желби“ и обезбеди учество на овој реномиран детски фестивал организиран од Сојузот на писатели на Р.Македонија. Фестивалот траеше два дена и се одржа во културниот дом  „Ацо Караманов“. 
Манифестацијата беше отворена од страна на градоначалникот и преседателот на фестивалот г-ѓа Славка Арсова. Покрај останатата публика гостуваа и повеќе писатели за деца меѓу кои Горјан Петревски, Филип Димкоски, Стојан Арсиќ, Горан Ачковски, Славка Арсова и др.. Ученичката гостуваше заедно со нејзиниот ментор, наставник по македонски јазик Мишевска Љупка. Покрај останатите подароци ученичката беше наградена со диплома за освоено прво место и успешно учество на фестивалот.

Во морето од желби

 Дете сум, па како и сите други
 имам желби еден милион.
 Некои се реални, а некои... кој знае
 можеби се остварливи само во сон.

Но,  желбите се дозволени нели?
Со нив е поинтересно, така се вели!
А кога во морето од желби јас бродам
не постои место во кое не можам да одам.

Ах, тие желби, постојано се низ мојата глава
како ли да стекнам светска слава?
Концерт на Мила,преполна сала,
аплаузи, гламур но јас уште сум мала,
а за таа желба верувајте се би дала!

Среќна сум од секоја  желба остварена,
но уште посреќна од љубовта  подарена,
од прегратката бабина остарена
од сечија насмевка искрено дарена.

Но,  желбите се дозволени нели?
Со нив е поинтересно, така се вели.
Сепак најголема желба ми е, секој здравје да има,
никаде војни, гладни и боси да нема.

                            Мила Маркоска VII-б одд.



„ГОЛЕМ ОДМОР“



             Учениците од I до IX одделение од централното  и  подрачното училиште на 18. 04 2017 г. (вторник) се претставија со пригодна програма во емисијата „Голем Одмор“ на МТВ со почеток во 10.30 часот. Носители на програмата беа наставникот по музичко образование во соработка со наставниците од одделенска и предметна настава.
   Програмата под мотото: „И пролетта празнува со нас“ беше исполнета со изведба на рецитали, стихотворби и драматизации на англиски и француски јазик како и интерпретации на музички точки со изведба во живо, поткрепени со кореографија.





ВЕЛИГДЕНСКИ ХЕПЕНИНГ


Во согласност со наставната програма за учебната 2016/2017 година беше планиран и реализиран ВЕЛИГДЕНСКИ ХЕПЕНИНГ. Одговорни наставници Софија Лукровска од одделенска настава и Виолета Павлеска од предметна настава.
Велигденскиот хепенинг започна во 15 часот. На претходно наместените клупи во холот од нашето училиште беа изложени изработките од учениците кои беа претходно изработени од самите ученици преку работилници со родители. Учество земаа сите одделенски раководители од одделенска и предметна настава и истите беа со својата паралелка до завршувањето на хепенингот до 16,30 часот. Присутни беа голем број на родители и гости на ова наше заедничко другарување. Собраните парични средства останаа кај одделенските раководители од одделенска и предметна настава и ќе бидат искористени за одредени приоритетни потреби во пералелката.


Monday, April 10, 2017

7 Април - Светскиот ден на здравјето

По повод 7 Април - Светскиот ден на здравјето , Здружението на бубрежно болни граѓани НЕФРОН реализираше работилници со учениците од трето одделение во централното и во подрачното училиште во населба Пинтија.
Едукативна активност  „Со здрави навики до здрави бубрези’’ како дел од проектот Децата и бубрежните болести - дејствувај навреме за да ги спречиш“, се состоеше од интерактивна едукативна презентација, поставување и одговарање на прашања со учениците, делење на подароци (едукативна тематска боенка, боички и шише вода) како мотивација и поттик за применување на здрави навики со цел превенција. Целата активност беше во траење од еден училишен час, односно 30 до 40 минути
        Носители на активноста беа Павлинка Балиска, дипл.психолог и Влатко Коколански, м-р по Јавно здравство, одделенските наставници и учениците од трето одделение.


         Извештајот го изготвил: Весна Рафевска - училишен педагог





Friday, April 7, 2017

посета на „САЕМОТ НА КНИГАТА 2017“


            На 07.04.2017 год. од 09,30 до 12,30 група од 108 ученика во која беа вклучени и членовите на библиотекарската секција, во придружба на училишниот библиотекар Никола Станковиќ и наставниците: Љуба Мишевска, Каролина Коларовска, Риса Тасиќ и Маја Грнчиштанова беа во посета на САЕМОТ НА КНИГАТА 2017.
        До саемот се патуваше со организиран превоз. Трошокот за превоз и влезница за саемот беше на товар на учениците. Влезницата беше по повластена цена за групна посета и чинеше 20 денари. На саемот беа разгледани повеќето од штандовите на издавачките куќи и беа земени каталози и рекламни материјали од истите за следење на нивната издавачка дејност, а учениците по сопствена желба, интерес и можност купија по некоја книга. По разгледувањето на штандовите, учениците организирано се вратија заедно со училишниот библиотекар и наставниците  во училиштето.

       Посетата на саемот и отсуството на учениците од настава во тој период беше одобрено од  директорот на училиштето Елизабета Славковска.






Monday, April 3, 2017

2 Април - Светски ден на детската книга

    2 април се празнува како светски ден на детската книга (International Children Book Day) за да ја испирира љубовта кон читањето и да го сврти вниманието кон детските книги во чест на роденденот на холандскиот автор на детски книги Ханс Кристијан Андерсен чија волшебност на неговите приказни достигнува до нас и по два века.
    Секоја година различна земја е домаќин на ова празнување која одлучува за темата и ги кани авторите од истата земја да напишат порака до децата од целиот свет, каде патем се ангажираат и илустратори на постер-дизајни од истата земја. Бројните пораки во еден дизајн остануваат валидни во текот на целата година сè додека не се избере нова земја - домаќин на овој настан.


    Кај нас настанот го одбележуваат издавачките куќи како „Вермилион“ и други, а истиот со пригодни активности се одбележува и во основните училишта.
      Во 1958 година УНЕСКО формира Меѓународен Златен медал по името на Андерсен, нарекуван уште и Мала Нобелова награда. Еднаш на две години оваа награда ја добиваат најдобрите писатели и сликари-илустратори на детски книги. Наградувани се Астрид Линдгрен, Селма Лагерлеф, Туве Јансон, Луис Керол и други.
   Во секоја земја во светот, од дамнешните времиња постоеле митови, приказни и легенди кои се предавале од колено на колено низ вековите, споделувајќи ја нивната идеја за креацијата, поврзувајќи се со историјата, споделувајќи го културното богатство, фрлајќи искри на љубопитност и овозможувајќи насмевки на лицата. За жал во многу земји во минатото, а и во денешно време, малкумина имале пристап до книгите. Но, со развојот на печатарството и издаваштвото, како и со развојот на општествата и нивното сфаќање на значењето на книгата како извор на знаење, мудрост и како средство за зачувување од заборавот на сопственото културно богатство, низ историјата па до денешно време овозможен им е пристапот до книгата на речиси сите, а најмногу на децата.
     Денес приказните допираат до секој возрасен и до секое дете исполнувајќи ја својата улога за креирање како на општеството, така и на семејствата, создавјќи индивидуи кои што имаат поголеми шанси да си ја најдат среќата.
Децата од одамна негувале интерес кон квалитетните наслови - со водство на „Малиот принц“, од „Гуливеровите патувања“, „Робинзон Крусо“, „Хаклбери Фин“, преку „Мери Попинс“ или „Алиса во земјата на чудата“, па сè до поблиското минато на „Хобитот“, „Господарот на прстените“, „Хрониките на Нарнија“, „Хари Потер“ и многу други.
   Светски и историски најпознатиот научник Алберт Ајнштајн за книгите и децата рекол: „Ако сакате вашите деца да бидат интелигентни, читајте им приказни. Ако сакате да бидат уште поинтелигентни, читајте им уште повеќе приказни“.

ХАНС КРИСТИЈАН АНДЕРСЕН
      Ханс Кристијан Андерсен е роден на 2 април 1805 година во Оденсе - Данска. Потекнувал од сиромашно семејство кое не можело да му овозможи редовно школување. Татко му му читал на малечкиот Ханс комедии, разни приказни, а најмногу необични бајки. Детето живеело со радост во светот на бајките, но за жал кркорењето во празниот стомак го потсетувало на постоењето на реалниот свет. Една стара и добродушна учителка го научила детето убаво да чита и пишува. По смртта на неговиот татко, сиромашниот живот, поткрепен само од мајчините скромни приходи, го натерал Ханс да се обидува и самиот да составува мали комедии, рецитации и песни кои потоа им ги претставувал на другите деца во својот малечок куклен театар. Сиромаштијата и тешкиот никогаш не го натерале да ја загуби волјата за подобар живот и ниту во еден момент не ја загубил храброста и вербата во себе.
    Неговото прво дело објавено е во 1829 година и не поминало добро кај пошироката јавност, но му овозможило многу познанства и пат до Велика Британија каде му бил гостин на Чарлс Дикенс. Неговото следно дело - романот „Импровизатор“ е одлично прифатено. По неговото објавување се вивнува во светот на уметноста и станува добредојден во друштвото на многу уметници, поети и членови на благородништвото со што дури тогаш неговиот живот почнал да му наликува на неговите бајки.
    Тој е еден од најголемите писатели на бајки. Ги проширувал, развивал народни мотиви во нив, но и создавал вистински дела. Неговите приказни се читливи, разбирливи и лесно се занесуваат во нивната содржина, као децата, така и возрасните. Тој комуницирал со децата и создавал толку впечатливи дела затоа што пишувајќи и самиот тој размислувал како дете. Такви се неговите приказни „Царевото ново руво“, „Оловниот војник“, „Малечката сирена“ и други. Умрел на 4. август 1875 година.

Познати цитати од Х.К.Андерсен:
-„Сè што ќе погледнеш, може да стане бајка, а сè до што ќе се допреш - да стане историја“.
-„Да му бидеш од корист на светот е единствениот начин да бидеш среќен“.
-„Целиот свет е серија на чуда. Само ние толку сме навикнати на нив, што ги нарекуваме обични нешта“.
-„Животот ми е најдобра илустрација на сите мои дела“.                                                         Изработил: Никола Станковиќ   (училишен библиотекар)


1 Април - Денот на шегата

По повод 1 Април - Денот на шегата, во подрачното училиште „Рајко Жинзифов“ во н.Пинтија, учениците од прво до петто одделение во придружба на нивните наставнички ја следеа комичната претстава ,,Малата принцеза Галена" каде актерите од Драмскиот театар на комичен начин ни ја опишаа принцезата и како таа успева да се спаси од здодевноста. Потоа маскираните ученици им ги покажаа своите маски на нивните другарчиња, а воедно беа избрани и најуспешните маски во секое одделение.


Одговорен наставник: Даниела Костадинова

Thursday, March 23, 2017

Ден на пролетта 21 Март


Согласно Годишната програма за работа на училиштето за учебната 2016/2017 година на 21 март (вторник) во нашето училиште се реализираа активности за одбележување на Денот на пролетта.
Учениците од предметна настава заедно со класните раководители беа вклучени во расчистување и уредување на училишниот двор.
Особено внимание се посвети на уредување на зелените површини во училишниот двор.
Наставниците од одделенска настава заедно со своите ученици се потрудија и ги уредија своите училници  и училишни холови во пролетен амбиент. Во активностите свој придонес дадоа и родители кои се потрудија учениците да имаат почиста и подобра работна средина.
         Учениците од прво и второ одделение изработија ликовни творби на тема ЕКОЛОГИЈА

И учениците од подрачното училиште во населба Пинтија, исто така, активно се вклучија во одбележувањето на Денот на пролетта!




Иновативни техники и стратегии за учење.

Во втората недела од месец март според планираните активности на Стручните активи од страна на педагогот на училиштето Весна Рфевска се реализираше презентација на тема: Иновативни техники и стратегии за учење. Беа презентирани следните техники: „Инстант креатива“, „5 Зошто“, „Клиптинг прашања“, „6 Шешири на Боно“, „Дневник во две колони“ и „Ако тогаш“.
Наставниците искажаа задоволство и подготвеност секогаш да ги следат новините во наставниот процес со цел кај учениците да се олесни процесот на учење.
Ставот на присутните на Стручниот актив беше дека со примената на техниките за учење  придобивките ќе бидат следни:
·        Иновативните техниките и стратегии  на учениците им помагаат  да бидат што поактивни во наставата;
·        Кај учениците се потттикнува критичкото размислување и учат ефикасно да учат;
·        На наставникот му даваат повратна информација за разбирањето на материјалот и усвојувањето на наставните содржини;
Со примената на иновативните техники за учење кој се составен дел од современата настава  учениците стануваат активни субјекти, а наставникот поттикнувач и насочувач