Насилството нема место меѓу нас

 

Во нашето училиште ООУ „Рајко Жинзифов“ на 22.10.2025 год. се одржа едукативна работилница на тема „Меѓуврсничко насилство“, реализирана од страна на психологот Бранка Бранковиќ и дефектолог Адријана Кукоска во рамките на активностите на Ученичкиот парламент. Целта на работилницата беше учениците да научат како да препознаат различни облици на насилство и како на мирен начин да ги решаваат конфликтите.

Како дел од активностите, членовите на парламентот активно учествуваа во дискусијата и изработија кутии за анонимна пријава на насилство, кои ќе бидат поставени во централното и во подрачното училиште на соодветно место. Дополнително, на претседателите на паралелките од VI до IX одделение им беа споделени онлајн формулари за анонимна пријава на насилство, со што секој ученик ќе има можност на безбеден и доверлив начин да пријави насилство и преку интернет.

психолог Бранка Бранковиќ

дефектолог м-р Адријана Кукоска

 

 

ОДБЕЛЕЖУВАЊЕ НА МЕЃУНАРОДНИОТ ДЕН НА БЕЛИОТ СТАП - 15 ОКТОМВРИ 2025

 

        Со  учениците од VI до  IХ одделение го одбележавме 15 октомври Меѓународниот ден на белиот стап, со пригодна презентација преку која учениците се запознаа со значењето на белиот стап кое е помагало кое им овозможува на слепите лица и лицата со оштетен вид да се движат со увереност, независност и еднакви можности. Учениците се запознаа и со Брајовата азбука со активност преку која се ставија на местото на слепите лица.

Со работилницата им пративме порака на овие лица дека секогаш сме спремни да им дадеме поддршка, да ги прифатиме во ова наше општeство кое е еднакво за сите.

дефектолог м-р Адријана Кукоска

Еврогајднес конференција во Граѓански ресурсен центар

 

На 14.10.2025, во Граѓанскиот ресурсен центар, се одржа Еврогајднес конференција, организирана од Национална агенција за европски образовни програми и мобилност, а поддржана од ОУРЦ „Златан Сремец“.

Од нашето училиште ООУ "Рајко Жинзифов" присуствуваа дефектологот Адријана Кукоска и психологот Бранка Бранковиќ, кои го следеа настанот и се запознаа со најновите методи и ресурси за поддршка на учениците за кариерно советување на ученици со посебни образовни потреби.

Оваа конференција беше одлична можност за размена на искуства, учење и јакнење на соработката помеѓу институциите кои работат со деца и ученици со посебни потреби.

дефектолог м-р Адријана Кукоска

психолог Бранка Бранковиќ

Одбележан Меѓународниот ден на менталното здравје

 

Дел од учениците од VI до IX одделение присуствуваа на интересен разговор и работилница на тема "Емоции", под водство на училишниот психолог Бранка Бранковиќ .

На работилницата учениците зборуваа за своите чувства, научија како да ги препознаваат и управуваат со нив, и разменија совети за тоа како да се поддржуваат меѓусебно. Искуствата и прашањата на учениците го направија разговорот инспиративен. Учениците на крајот од работилницата добија практични и корисни алатки за подобро ментално здравје.

Оваа активност покажа дека емоциите се важни, а грижата за менталното здравје е за сите – затоа што секој ученик заслужува да се чувствува поддржано и разбрано!

 

психолог Бранка Бранковиќ

Одбележан Меѓународниот ден на церебралната парализа

 

Ученици од VI до IX одделение, учествуваа во работилницата за церебралната парализа, реализирана од страна на училишниот дефектолог м-р Адријана Кукоска.

На работилницата се зборуваше за тоа како лицата со церебрална парализа живеат, со какви предизвици се соочуваат и како сите ние можеме да бидеме поддршка и пријатели. Учениците активно учествуваа, поставуваа прашања и разменија мислења, добија практични начини за емпатија, разбирање и инклузија во секојдневниот живот.

Со оваа активност се поттикнува свесноста дека секој човек заслужува почит, грижа и прифаќање, и дека малите гестови на поддршка можат да направат голема разлика.

 

дефектолог м-р Адријана Кукоска

Реализираните активности за Детска недела, под мотото: ,,Детето денес - иднината утре!“ (6 -10 октомври 2025 год.)

 

По повод  детската  недела  под мотото:,, Детето денес-иднината утре!“ во нашето училиште на ниво на одделенска настава се реализираа бројни активности  во сите паралелки.

Одговорните наставници од актив второ одделение: Весна Милановска, Билјана Петровска и Мануела Маркоска, според програмата  изработија Флаер со предлог-активности за цела седмица и ги споделија со останатите колешки.

Понделник (6.10.2025год) беше резервиран за поделба на Флаерите и  теоретски дел, следење на презентација за ,,Правата на децата“ и неколку зборови за Конвенцијата за правата на децата. Учениците ја проследија изтата, поведовме дискусија и изработија соодветни илустрации.

Вторникот (7.10.2025год.) во прво и второ одделение беа реализирани активности со боење на боенки-илустрации за детските права и изработка на книга со правата на дететео.

Додека пак во трето, четврто и петто одделение се пишуваа литературни  песнички и литературни состави.

Среда (7.10.2015год.) беше ден посветен на спортот и се реализираа интересни игри, на кои учениците спортуваа, играа и се забавуваа.

Четврток (8.10.2025год.) се реализираа активности за изработка на Книги од личните творби  и пораки на учениците.

Петок (10.10.2025год.) се реализираше Свечена приредба од учениците од второ одделение за Свечен прием на првачињата во Детската организација. Учениците упатија убави пораки, ги кажаа своите детски права, им пееја ги забавуваа и им подарија Беџеви и Емотикон-Смајли со Заклетвата.

 

одделенски наставник  Мануела Маркоска